L’aministrazion chemunela fej al savëi, che da utober 2020 inant pudrà uni zitadin de Sëlva se damandé la nueva cherta de identità eletronica.
La cherta de identità de papier vën me plu fata te caji de ezezion, che ie ududes dant dala lege.
Chi?
La cherta de identità eletronica vën fata a duc i zitadins, talians o fulestieres, che ie residënc te Sëlva. Te chësc mumënt ne iel nia puscibl fé la cherta de identità eletronica ai zitadins che ie residënc oradecà (AIRE).
Apuntamënt:
La cherta de identità eletronica vën me fata sun apuntamënt. N possa fé ora n apuntamënt dal lunesc al vënderdi dala 08:15 ala 12:15, cherdan su l numer de telefon 0471772113 o se prejentan tl ufize demografich.
Pra uni apuntamënt uniral me fat una na cherta de identità eletronica. Tl cajo che plu cumpunënc dla familia se damanda la nueva cherta de identità iel de bujën fé n apuntamënt per uni singula persona.
Validità:
•3 ani per mutons dai 0 ai 3 ani
•5 ani per mutons y jëuni dai 3 ai 18 ani
•10 ani per chëi che à bele cumplì 18 ani
Atenzion!
Canche l se muda i dac sciche p.ej. situazion de familia, residënza o lëur muessa la cherta de identità nia unì mudeda. La cherta de identità, che ne vela nia per ji oradecà, à na anutazion dovia.
Documentazion che n adorva:
Per chëi che à 18 ani: Per se damandé la cherta de identità eletronica iel debujën che la persona che sla damanda se prejënta, do avëi fat ora n apuntamënt, te ufize cun chisc documënc:
•La cherta de identità tumeda/ danejeda o n auter documënt de recunescimënt o doi testemonesc cun n documënt de recunescimënt che vel
•La denunzia tl cajo che la cherta de identità da dant ie jita perduda o ie unida rubeda
•Tessera sanitera
•1 na fotografia per pas atuela (la ne daussa nia vester plu vedla de 6 mënsc) sun n viadò blanch: aldò dl Standard ICAO; N possa nce mandé la fotografia digitela tres e-mail (info@selva.eu) n doi dis dan l‘apuntamënt.
•Soma de Euro 22,21;
Per mutons/jëuni: Per se damandé la cherta de identità eletronica iel debujën che l/la mut/a o l/la jëun/a che sla damanda se prejënta te ufize adum cun si genitoresc y che l/la tol pea chisc documënc:
•La cherta de identità tumeda/ danejeda o n auter documënt de recunescimënt o doi testemonesc cun n documënt de recunescimënt che vel
•La denunzia tl cajo che la cherta de identità da dant ie jita perduda o ie unida rubeda
•Tessera sanitera
•1 na fotografia per pas atuela (la ne daussa nia vester plu vedla de 6 mënsc) sun n viadò blanch: aldò dl Standard ICAO;
•Soma de Euro 22,21;
•Documënc de recunescimënt de tramdoi i genitoresc
•Per avëi la cherta de identità che vela nce per ji oradecà adroven la firma de tram doi i genitoresc.
Mutons dai 12 ani mpò muessa firmé si cherta de identità.
Merca dl dëit y firma:
Tl mumënt te chël che vën fat l documënt vëniel tëut ju i dac biometrics, sëuraprò ala firma vëniel nce tëut ju la fotografia y la merca dl dëit dl damandant.
Mutons sota ai 12 ani ne muessa no dé ju la merca dl dëit y nianca no firmé l documënt.
Dunazion de organns, tessuc y zeles:
Tl mumënt che n se damanda la cherta de identità eletronica possa uni damandant che à cumplì la majera età dé ju si ulentà de duné organns, tessuc y zeles.
PIN y PUK:
Tl mumënt che n fej la nueva cherta de identità eletronica vëniel sëurandat la prima pert dl numer PIN y dl numer PUK. La segonda pert de chisc numri vën pona mandeda, te na busta stluta, adum cun la cherta de identità. Chisc numri adroven per ativé l Spid sun la plata internet www.cartaidentita.interno.gov.it o per se nuzé di servijes online dl INPS.
Tëmps de cunsënia:
La cherta de identità eletronica vën mandeda,dal Istitut Poligrafich de Roma, tl tëmp danter set a diesc dis, cun lëtra recumandeda, al’adres che l zitadin à dat sëura. Sce l damandant/delegà à pië do ne ie tl mumënt dla cunsënia nia ilò, pona uniral lascià na comunicazion,te chëla che l ie scrit coche n possa fé a ji a se to la cherta de identità.
Cosć:
I cosć dla cherta de identità eletronica ie de 22,21 € da paië bret, nia cun bancomat, diretamënter tl ufize anagrafich.
Plu nfurmazions: www.cartaidentita.interno.gov.it
